شاہ رخ خان کو قتل کی دھمکیاں  

اسلام آباد  ( شو بز )، گھر "منت "کی سیکیورٹی بڑھا دی گئی- فلم "پٹھان" اور" جوان "کی کامیابی کے بعد بالی ووڈ کے کنگ خان شاہ رخ خان کو قتل کی دھمکیاں ملنے لگی ہیں ۔قتل کی دھمکیاں ملنے کے بعدان کی سیکیورٹی میں اضافہ کردیا گیا ہے،ریاست مہاراشٹرا کی حکومت نے شاہ رخ خان کو +Y کیٹیگری کی سیکیورٹی فراہم کردی ہے۔ رواں سال شاہ رخ خان کے لیے خاصا اچھا رہا، چند ماہ قبل ریلیز ہونے والی یش راج فلمز کی" پٹھان" نے پوری دنیا میں کامیابی سے بزنس کرتے ہوئے 1050 کروڑ کا
مجموعی بزنس کیا جب کہ فلم "جوان اب تک پوری دنیا میں 1090 کروڑ کا بزنس کرچکی ہے"۔

بھارتی میڈیا رپورٹس کے مطابق شاہ رخ نے  رواں سال 2 سپر ہٹ فلمیں "پٹھان" اور "جوان "دیں جس کے بعد نامعلوم افراد کی جانب سےانہیں دھمکی آمیز پیغامات مسلسل موصول ہورہے ہیں۔"جیو نیوز " کے مطابق مہاراشٹرا کا وی آئی پی سیکیورٹی یونٹ ہر وقت شاہ رخ کے ساتھ رہے گا، اس سیکیورٹی یونٹ میں 6 پرسنل سیکیورٹی افسران اور 5 مسلح گارڈز شامل ہیں۔اس کے علاوہ ممبئی میں شاہ رخ خان کے گھر "منت "کی سیکیورٹی بھی بڑھا دی گئی ہے، ممبئی پولیس کے 4 اہلکار 24 گھنٹے اداکار کے گھر کی حفاظت پر مامور رہیں گے۔اس سے قبل شاہ رخ خان کے ساتھ 2 مسلح گارڈز ہوتے تھے، شاہ رخ کے علاوہ سلمان خان کو بھی وائی پلس سیکیورٹی فراہم کی گئی ہے۔