کراچی: ڈیفنس فیز 6 کے فلیٹ میں مردہ پائی جانے والی اداکارہ حمیرا اصغر کی لاش کا پوسٹ مارٹم مکمل کرلیا گیا
پولیس کے مطابق اداکارہ حمیرا اصغر کا تعلق لاہور سے تھا۔ ان کی لاش سرد خانے منتقل کر دی گئی ہے جبکہ لواحقین سے رابطہ کر لیا گیا ہے۔
پولیس کا کہنا ہے کہ حمیرا نے یہ فلیٹ 2018 میں کرائے پر لیا تھا، لیکن 2024 سے کرایہ ادا نہیں کیا گیا جس پر مالک مکان نے عدالتی مقدمہ دائر کر رکھا تھا۔ عدالت کے حکم پر جب پولیس فلیٹ خالی کرانے پہنچی تو دروازہ بند تھا۔ پولیس نے دروازہ توڑ کر اندر داخل ہو کر دیکھا تو اداکارہ کی لاش موجود تھی۔
واقعے کے بعد عدالتی بیلف نے فلیٹ کو سیل کر دیا، جبکہ معاملے کی مختلف پہلوؤں سے تفتیش جاری ہے۔ پولیس کے مطابق مرحومہ کے موبائل فون کا ڈیٹا حاصل کر لیا گیا ہے اور موت کی اصل وجہ کیمیکل ایگزامینیشن رپورٹ آنے کے بعد معلوم ہو سکے گی۔
پڑوسیوں کے مطابق حمیرا اصغر بلڈنگ کے دیگر افراد سے زیادہ میل جول نہیں رکھتی تھیں۔
واضح رہے کہ حمیرا اصغر نے پاکستانی ریئلیٹی شو 'تماشا گھر' کے پہلے سیزن میں شرکت کی تھی۔