محکمہ موسمیات نے ملک کے مختلف شہروں میں کل سے بارشوں کی پیشگوئی کر دی ہے۔ ادارے کے مطابق، مغربی ہواؤں کا ایک سلسلہ 9 مارچ کو شمالی علاقوں میں داخل ہوگا اور یہ سلسلہ 16 مارچ تک برقرار رہے گا۔
محکمہ موسمیات کے مطابق، 9 سے 16 مارچ کے دوران چترال، مری، گلگت بلتستان اور کشمیر میں بارشیں متوقع ہیں۔ 10 مارچ کو اسلام آباد، راولپنڈی، اٹک، جہلم، چکوال، پشاور، چارسدہ اور مردان میں بھی بارش ہو سکتی ہے، جبکہ 12 سے 16 مارچ کے دوران پنجاب کے مختلف شہروں میں بارش کا امکان ہے۔
14 اور 15 مارچ کو بلوچستان میں بھی گرج چمک کے ساتھ بارشیں متوقع ہیں، جس کے نتیجے میں اسلام آباد، لاہور، پشاور، کوئٹہ اور دیگر شہروں میں اربن فلڈنگ کا خطرہ بڑھ سکتا ہے۔ محکمہ موسمیات نے خبردار کیا ہے کہ ملک کے بلند علاقوں میں شدید برفباری کی وجہ سے سڑکیں بند ہونے کا خدشہ ہے۔
مزید برآں، خیبر پختونخوا، کشمیر اور گلگت بلتستان میں موسلا دھار بارشوں کے نتیجے میں لینڈ سلائیڈنگ کا امکان ہے۔ محکمہ موسمیات نے ماہی گیروں، سیاحوں اور مسافروں کو احتیاط برتنے کی ہدایت کی ہے جبکہ کسانوں کو فصلوں کے تحفظ کے لیے پیشگی اقدامات کرنے کی تجویز دی گئی ہے۔