نیپر / مانیٹرنگ ڈیسک: نیوزی لینڈ اور پاکستان کے درمیان پہلا ایک روزہ میچ ہفتہ کے روز نیپئر میں ہوگا، جس میں کیوی ٹیم کی قیادت ٹام لیتھم کریں گے۔ اسکواڈ میں پاکستانی نژاد محمد عباس کو بھی شامل کیا گیا ہے، جو پاکستان میں پیدا ہوئے تھے اور بعد میں اپنے اہل خانہ کے ساتھ نیوزی لینڈ منتقل ہوگئے۔ محمد عباس، فرسٹ کلاس کرکٹر اظہر عباس کے بیٹے ہیں، جو نیوزی لینڈ میں آکلینڈ اور ویلنگٹن کی نمائندگی کے ساتھ فائر بورڈز کے اسسٹنٹ کوچ بھی ہیں۔
نیوزی لینڈ کرکٹ کے مطابق، کئی اہم کھلاڑی آئی پی ایل مصروفیات کے باعث اس سیریز میں حصہ نہیں لے رہے، جن میں میچل سینٹنر، راچن رویندرا، ڈیون کانوائے اور گلین فلپس شامل ہیں۔ تاہم، اسکواڈ میں آئی سی سی چیمپئنز ٹرافی کے فائنل میں شرکت کرنے والے آٹھ کھلاڑی موجود ہیں۔ دیگر کھلاڑیوں میں آدی اشوک، مائیکل بریسویل، مارک چیپمین، جیکب ڈفی، مچ، نک کیلی، ول او رورکی، بین سئیرز، نیتھن سمتھ اور ول ینگ شامل ہیں۔ پاکستان اور نیوزی لینڈ کے درمیان تین میچوں پر مشتمل یہ سیریز 29 مارچ، 2 اپریل اور 5 اپریل کو کھیلی جائے گی۔