ڈھاکہ / مانیٹرنگ ڈیسک: بنگلہ دیش کی عدالت نے کرکٹر اور سابق رکن اسمبلی شکیب الحسن کے اثاثے ضبط کرنے کا حکم دے دیا۔غیر ملکی ذرائع ابلاغ کے مطابق، ڈھاکا کے ایڈیشنل چیف میٹروپولیٹن مجسٹریٹ، ضیاء الدین رحمان، نے پیر کے روز چیک باؤنس کے مقدمے میں شکیب الحسن کی جائیداد ضبط کرنے کا فیصلہ سنایا۔ رپورٹس کے مطابق، شکیب نے 2016 میں ستکھیرا میں ایک کیکڑے کا فارم قائم کیا تھا، جو 2021 سے بند ہے۔ مذکورہ چیکس اس قرض کی ادائیگی کے لیے جاری کیے گئے تھے، جو ان کی کمپنی نے بینک سے حاصل کیا تھا، تاہم ناکافی فنڈز کے باعث چیکس کلیئر نہ ہو سکے۔
اکتوبر 2024 میں بینک نے چیکس باؤنس ہونے پر قانونی نوٹس جاری کیا، جس کے بعد 24 دسمبر کو شکیب اور ان کی کمپنی کے تین دیگر عہدیداروں کے خلاف مقدمہ درج کیا گیا۔ جنوری میں عدالت نے اس کیس میں ان کے وارنٹ گرفتاری بھی جاری کر دیے۔
واضح رہے کہ شکیب الحسن سیاسی عدم استحکام اور عوامی لیگ سے تعلقات کی وجہ سے جان سے مارنے کی دھمکیاں ملنے کے بعد ملک سے باہر ہیں۔ وہ گزشتہ سال حکومت مخالف مظاہروں کے دوران ایک نوجوان کے قتل کے کیس میں بھی نامزد ہو چکے ہیں۔