اسلام آباد/ مانیٹرنگ ڈیسک: وفاقی وزیر خزانہ سینیٹر محمد اورنگزیب نے قومی اسمبلی میں تحریری جواب جمع کرایا، جس میں انہوں نے واضح کیا کہ آئندہ مالی سال میں سرکاری ملازمین کی تنخواہوں میں اضافے کا کوئی امکان نہیں۔ انہوں نے مزید بتایا کہ ملازمین کے الاؤنسز اور پے اسکیل میں کسی بھی قسم کی تبدیلی زیر غور نہیں ہے۔ اجلاس کے دوران وزیر خزانہ نے یہ بھی کہا کہ وفاقی سرکاری ملازمین کی پنشن میں اضافے کی کوئی تجویز موجود نہیں، تاہم ملازمین کے لیے ہاؤسنگ الاؤنس اور سیلنگ کی حد میں ممکنہ اضافے پر غور کیا جا رہا ہے۔
پاکستان نے 2024 میں 11,475 ملین ڈالر کا غیر ملکی قرضہ ادا کیا: وزیر خزانہ
قومی اسمبلی اجلاس کے دوران وزارت خزانہ نے گزشتہ پانچ سال کے دوران حاصل کیے گئے غیر ملکی قرضوں اور ان کی ادائیگیوں کی تفصیلات پیش کیں۔ وزارت خزانہ کے مطابق جون 2023 تک پاکستان کے مجموعی غیر ملکی قرضے اور واجبات 126,141 ملین ڈالر تک پہنچ گئے تھے، جو ملک کی مجموعی قومی پیداوار (جی ڈی پی) کا 43.03 فیصد بنتے ہیں۔ سینیٹر محمد اورنگزیب نے بتایا کہ مالی سال 2024 میں پاکستان نے 11,475 ملین ڈالر کا غیر ملکی قرضہ ادا کیا۔
اجلاس میں وزارت تجارت کی جانب سے گزشتہ پانچ سال کے تجارتی خسارے کی تفصیلات بھی پیش کی گئیں، جن کے مطابق اس عرصے کے دوران ملک کو 154 ارب ڈالر کے تجارتی خسارے کا سامنا کرنا پڑا۔ دستاویزات میں مزید بتایا گیا کہ گزشتہ پانچ سال کے دوران پاکستان کی برآمدات 136 ارب ڈالر تک رہیں، جبکہ اسی مدت میں درآمدات کا حجم 291 ارب ڈالر تک پہنچ گیا۔ وزارت کے مطابق درآمدات میں اضافے کی بنیادی وجہ ملک کی اقتصادی ترقی ہے۔