فیصل آباد میں موٹر وے کے قریب اجتماعی زیادتی کا المناک واقعہ پیش آیا، جہاں مسلح ڈاکوؤں نے ایک جوڑے کو روکا، شوہر کو باندھ دیا اور اس کی بیوی کو درندگی کا نشانہ بنایا۔پولیس کے مطابق، یہ افسوسناک واقعہ تھانہ
ساندل بار کی حدود میں دو روز قبل پیش آیا، جس کا مقدمہ درج کرلیا گیا ہے۔ شوہر نے واقعے کے تقریباً بارہ گھنٹے بعد پولیس سے رابطہ کیا، اور معاملے کی ہر زاویے سے تفتیش جاری ہے۔
ایف آئی آر میں درج تفصیلات کے مطابق، عدنان مسیح نامی شخص نے پولیس کو بتایا کہ 25 مارچ کی رات وہ اپنی بیوی کے ساتھ گاؤں جا رہا تھا، جب موٹر وے پل کے قریب سروس ایریا میں مسلح افراد نے انہیں گھیر لیا۔ ڈاکوؤں نے اسے باندھ دیا اور اس کی بیوی کو قریبی کھیتوں میں لے جا کر زیادتی کا نشانہ بنایا، جبکہ ان کے موبائل فون اور نقدی بھی چھین کر فرار ہو گئے۔
پولیس کے ترجمان کے مطابق، مقدمہ درج ہونے کے بعد ایس پی اقبال ٹاؤن کی سربراہی میں تین خصوصی ٹیمیں تشکیل دی گئی ہیں جو ملزمان کی گرفتاری کے لیے چھاپے مار رہی ہیں۔