ممبئی / مانیٹرنگ ڈیسک: پاکستانی شوبز کے معروف اداکار فواد خان نے عید کے موقع پر اپنے مداحوں کو خاص تحفہ دے دیا۔ انہوں نے انسٹاگرام پر اپنی نئی بالی ووڈ فلم کا ٹیزر شیئر کیا، جس کے ساتھ انہوں نے بھارتی سنیما میں اپنی واپسی کا اعلان بھی کیا۔ فواد خان 9 مئی کو تقریباً 9 سال بعد دوبارہ بالی ووڈ میں جلوہ گر ہوں گے۔
گزشتہ روز فواد خان اور بھارتی اداکارہ وانی کپور کی فلم عبیر گلال کا پہلا ٹیزر جاری کر دیا گیا۔ لندن میں فلمائی گئی اس رومانوی کامیڈی فلم میں فواد خان عبیر سنگھ کا مرکزی کردار ادا کر رہے ہیں، جبکہ ان کے مقابل وانی کپور نظر آئیں گی۔ ایک منٹ اور دو سیکنڈ پر مشتمل ٹیزر میں فواد خان 1994 کی مشہور بالی ووڈ فلم 1942 اے لو اسٹوری کے گانے کچھ نہ کہو کو گنگناتے دکھائی دے رہے ہیں۔
یہ فلم آرتی ایس بگدی کی ہدایت کاری میں بنی ہے اور اس کی کہانی لندن میں پروان چڑھنے والی ایک محبت کی داستان کے گرد گھومتی ہے، جس میں غیر متوقع موڑ اور دل کو چھو لینے والے لمحات شامل ہیں۔ فلم میں فواد خان اور وانی کپور کی جوڑی کو خوبصورتی سے پیش کیا گیا ہے۔
یہ بھی قابل ذکر ہے کہ 2018 کے بعد کسی پاکستانی اداکار کی یہ پہلی بالی ووڈ فلم ہے، جبکہ اس سے قبل عمران عباس گزشتہ سال ایک پنجابی فلم میں کام کر چکے ہیں۔ یاد رہے کہ 2016 میں پاکستانی فنکاروں پر پابندی عائد کی گئی تھی، جسے 2023 میں بھارتی انتہا پسند جماعت شیو سینا نے قانونی حیثیت دینے کے لیے عدالت میں اپیل دائر کی تھی، تاہم بھارتی عدالت نے اس اپیل کو مسترد کر دیا تھا۔ فواد خان آخری بار 2016 میں اے دل ہے مشکل میں نظر آئے تھے۔