مسقط (مانیٹرنگ ڈیسک) – سلطنت عمان کے حکام نے عیدالفطر کے موقع پر عوام کے لیے 9 روزہ طویل تعطیلات کا اعلان کیا ہے۔
عمان میں 1446 ہجری کی عیدالفطر کی تعطیلات ہفتہ، 29 مارچ 2025 سے شروع ہو کر جمعرات، 3 اپریل 2025 (4 شوال 1446 ہجری) تک جاری رہیں گی۔ چونکہ ہفتہ اور اتوار (5 اور 6 اپریل) عام تعطیل کے دن ہیں، اس لیے سرکاری اور نجی ادارے پیر، 7 اپریل 2025 سے دوبارہ کام شروع کریں گے۔ یہ اعلان چاند نظر نہ آنے کے بعد کیا گیا، جس کے نتیجے میں پیر، 31 مارچ 2025 کو عیدالفطر کا پہلا دن مقرر کیا گیا۔
عیدالفطر اس وقت سعودی عرب، متحدہ عرب امارات، امریکہ، برطانیہ، فرانس اور ترکیہ سمیت کئی ممالک میں منائی جا رہی ہے، جبکہ ایران، عمان، انڈونیشیا، ملائیشیا، برونائی، آسٹریلیا، بھارت اور بنگلہ دیش میں چاند نظر نہ آنے کے باعث پیر کے روز عید منانے کا اعلان کیا گیا ہے۔ اس سے قبل امکان ظاہر کیا جا رہا تھا کہ اس سال دنیا کے زیادہ تر ممالک میں ایک ہی دن عید منائی جا سکتی ہے، تاہم سعودی عرب میں چاند نظر آنے کے بعد وہاں رمضان 29 دنوں میں مکمل ہوا۔ دوسری جانب پاکستان اب بھی اپنے سرکاری چاند دیکھنے کے اعلان کا انتظار کر رہا ہے۔