دوبئی/ مانیٹرنگ ڈیسک: خلیج ٹائمز کے مطابق وفاقی اتھارٹی برائے سرکاری انسانی وسائل (FAHR) نے ایک سرکلر جاری کیا ہے جس میں بتایا گیا ہے کہ وفاقی حکومت کے اداروں میں عید الفطر کی تعطیلات یکم سے 3 شوال تک ہوں گی، جبکہ معمول کے سرکاری امور 4 شوال سے بحال ہوں گے۔
رپورٹ میں مزید وضاحت کی گئی ہے کہ اگر رمضان المبارک 30 دنوں پر مشتمل ہوا تو 30 رمضان کی اضافی تعطیل دی جائے گی، جس سے عید الفطر کی مجموعی چھٹیاں مزید طویل ہو جائیں گی۔
نجی شعبے کے لیے عید الفطر کی چھٹیوں کا باضابطہ اعلان تاحال سامنے نہیں آیا، لیکن توقع ہے کہ یہاں بھی سرکاری ملازمین کی طرح ہی چھٹیوں کا شیڈول نافذ ہوگا۔
اگر شوال کا چاند ہفتہ 29 مارچ کی شام نظر آ جاتا ہے تو عید الفطر اتوار 30 مارچ کو منائی جائے گی، اور اس صورت میں سرکاری تعطیلات اتوار سے منگل تک ہوں گی، جبکہ زیادہ تر افراد کو ہفتہ سے منگل تک چار دن کے طویل ویک اینڈ کا موقع ملے گا۔
دوسری جانب، اگر ہفتہ کی شام چاند نظر نہ آیا اور رمضان مکمل 30 روزوں پر مشتمل ہوا، تو عید 31 مارچ بروز پیر ہوگی۔ اس صورت میں، ہفتے سے شروع ہونے والی تعطیلات بدھ 2 اپریل تک جاری رہیں گی، جس سے سرکاری ملازمین کو مسلسل پانچ دن کا طویل ویک اینڈ ملے گا۔