لاہور/ مانیٹرنگ ڈیسک: آئی سی سی چیمپئنز ٹرافی کے بعد بھارتی میڈیا نے پاکستان کرکٹ کے خلاف منفی پروپیگنڈا شروع کر دیا، جس پر پاکستان کرکٹ بورڈ (پی سی بی) نے شدید ردعمل دیتے ہوئے الزامات کو بے بنیاد اور من گھڑت قرار دیا ہے۔ پی سی بی کے ترجمان کا کہنا ہے کہ بھارتی میڈیا غیر مصدقہ اور قیاس آرائیوں پر مبنی خبریں پھیلا رہا ہے، جس کی کوئی حقیقت نہیں۔ ان کے مطابق قومی ٹی ٹوئنٹی ٹورنامنٹ میں کھلاڑیوں کی میچ فیس میں کمی کو جواز بنا کر جھوٹا بیانیہ گھڑا جا رہا ہے۔
ترجمان نے واضح کیا کہ چیمپئنز ٹرافی کی میزبانی سے پی سی بی کو کسی قسم کا نقصان نہیں ہوا، بلکہ پاکستان کو 6 ملین ڈالرز کی میزبانی فیس ملے گی، جبکہ گیٹ منی سے ہونے والی آمدنی کا حتمی فیصلہ کچھ مہینوں میں آڈٹ کے بعد ہوگا۔ مزید برآں، چیمپئنز ٹرافی کے دوران ہوٹل، سفری اخراجات، انعامی رقم اور دیگر تمام مالی امور آئی سی سی خود برداشت کرے گا۔ اس کے برعکس، بھارتی میڈیا کی رپورٹ میں دعویٰ کیا گیا کہ چیمپئنز ٹرافی 2025 کی میزبانی کے نتیجے میں پی سی بی کو 85 ملین ڈالر (869 کروڑ روپے) کا نقصان اٹھانا پڑا، جس کے باعث کھلاڑیوں کی میچ فیس میں کٹوتی اور 5 اسٹار ہوٹلوں کی سہولت ختم کرنے جیسے سخت اقدامات کیے گئے۔