کوئٹہ / مانیٹرنگ ڈیسک: بلوچستان کے ضلع نوشکی میں پولیس کی گشتی موبائل پر فائرنگ کے نتیجے میں چار اہلکار شہید ہو گئے۔پولیس حکام کے مطابق یہ واقعہ غریب آباد کے قریب پیش آیا، جہاں نامعلوم حملہ آوروں نے پولیس موبائل پر فائرنگ کی، جس کے نتیجے میں چار اہلکار موقع پر ہی جان کی بازی ہار گئے۔ شہداء کی میتیں قریبی اسپتال منتقل کر دی گئیں۔
ادھر، وزیر اعلیٰ بلوچستان نے نوشکی میں پولیس پر حملے اور مزدوروں کے قتل کی شدید مذمت کرتے ہوئے کہا کہ پولیس اہلکاروں اور بےگناہ مزدوروں کا خون رائیگاں نہیں جائے گا۔ انہوں نے حملے میں ملوث عناصر کے خلاف سخت کارروائی کا حکم دیا اور کہا کہ مجرموں کو بلوچستان میں چھپنے نہیں دیا جائے گا۔
اس سے قبل، بلوچستان کے ضلع قلات کے علاقے منگچر میں بھی فائرنگ کا ایک واقعہ پیش آیا، جس میں چار افراد جاں بحق ہو گئے۔