قلات / مانیٹرنگ ڈیسک: بلوچستان کے ضلع قلات کے علاقے منگچر میں فائرنگ کے واقعے میں چار افراد جان کی بازی ہار گئے۔اسسٹنٹ کمشنر منگچر، علی گل کے مطابق نامعلوم مسلح افراد نے ملنگ زئی میں ایک ٹیوب ویل کی تنصیب میں مصروف مزدوروں پر گولیاں برسادیں، جس کے نتیجے میں چار مزدور جاں بحق ہوگئے۔ انہوں نے مزید بتایا کہ مرنے والے تمام افراد کا تعلق صادق آباد سے تھا، اور ان کی لاشوں کو قانونی کارروائی مکمل کرنے کے بعد وہاں روانہ کر دیا گیا۔
دوسری طرف، وزیراعظم شہباز شریف نے اس واقعے کی سخت مذمت کرتے ہوئے مزدوروں پر ہونے والے حملے کو بزدلانہ کارروائی قرار دیا۔ انہوں نے جاں بحق مزدوروں کے درجات کی بلندی کی دعا کی اور کہا کہ وہ متاثرہ خاندانوں کے غم میں برابر کے شریک ہیں۔ وزیراعظم کا کہنا تھا کہ محنت کشوں کو نشانہ بنانے والے انسانیت کے دشمن ہیں اور ملک سے دہشت گردی کے مکمل خاتمے تک حکومت چین سے نہیں بیٹھے گی۔