نیویارک: امریکی سکھ تنظیم سکھ فار جسٹس نے بلوچستان میں ٹرین حملے میں بھارت کے ملوث ہونے کا دعویٰ کرتے ہوئے خبردار کیا ہے کہ اگر بھارت کا احتساب نہ کیا گیا تو اس کا اگلا حملہ مزید معصوم جانوں کا نقصان کر سکتا ہے۔
سکھ فار جسٹس کے رہنما گرپتونت سنگھ پنوں نے اپنے بیان میں کہا کہ بلوچستان میں جعفر ایکسپریس پر ہونے والے دہشت گرد حملے میں بھارت کی خفیہ ایجنسی ’را‘ کا ہاتھ ہے۔ انہوں نے عالمی اداروں سے مطالبہ کیا کہ بھارتی قومی سلامتی کے مشیر اجیت دوول اور را کے خلاف کارروائی کی جائے۔
گرپتونت سنگھ پنوں کے مطابق بھارت خفیہ جنگی حکمت عملی پر عمل پیرا ہے، اور مودی حکومت صرف علاقائی خطرہ نہیں بلکہ ریاستی دہشت گردی میں ملوث ایک ظالم حکومت ہے۔ انہوں نے الزام لگایا کہ بھارت پڑوسی ممالک کو غیر مستحکم کرنے کے لیے خفیہ کارروائیوں، سرحد پار دہشت گردی اور بیرون ملک مخالفین کے قتل میں ملوث ہے۔
انہوں نے مزید کہا کہ مودی نے بھارت کو عالمی سطح پر ریاستی دہشت گردی کا مرکز بنا دیا ہے اور را کی بے قابو کارروائیاں جنوبی ایشیا کو خطرے میں ڈال رہی ہیں۔ ان کا مطالبہ تھا کہ بھارت کی خفیہ ایجنسیوں پر سفارتی اور سیکیورٹی پابندیاں عائد کی جائیں، کیونکہ دنیا مزید بھارتی دہشت گردی پر خاموش نہیں رہ سکتی۔
یاد رہے کہ منگل کے روز بلوچستان کے علاقے بولان میں کالعدم بی ایل اے کے دہشت گردوں نے جعفر ایکسپریس پر حملہ کر کے مسافروں کو یرغمال بنا لیا تھا۔ سیکیورٹی فورسز نے دو روزہ آپریشن کے بعد 33 دہشت گردوں کو ہلاک کیا، جبکہ 21 مسافر اور 4 فوجی شہید ہوئے۔ سیکیورٹی ذرائع کے مطابق حملہ آور افغانستان میں موجود اپنے ماسٹرز سے رابطے میں تھے۔