ویلنگٹن / مانیٹرنگ ڈیسک: نیوزی لینڈ کرکٹ بورڈ نے پاکستان کے خلاف 16 مارچ سے شروع ہونے والی پانچ میچوں کی ٹی ٹوئنٹی سیریز کے لیے اپنی ٹیم کا اعلان کر دیا ہے، جس کی قیادت مائیکل بریسویل کریں گے۔
اس اسکواڈ میں چیمپئنز ٹرافی کھیلنے والے سات کھلاڑیوں کو شامل کیا گیا ہے، تاہم کچھ اہم کرکٹرز اس سیریز کا حصہ نہیں بن سکیں گے۔ لوکی فرگوسن، ڈیون کونوے، گلین فلپس، رچن روندرا اور مچل سینٹنر آئی پی ایل میں مصروف ہونے کے باعث دستیاب نہیں ہوں گے۔
ٹیم میں ایش سودھی اور بین سیئرز کی واپسی ہوئی ہے، جبکہ کائل جیمیسن اور ول او رورکی ابتدائی تین میچز میں کھیلیں گے، جبکہ میٹ ہینری آخری دو میچوں کے لیے دستیاب ہوں گے۔
اعلان کردہ اسکواڈ میں کپتان مائیکل بریسویل کے ساتھ فن ایلن، مارک چیپمین، جیکب ڈفی، زیک فوکس، مچ ہے، میٹ ہینری، کائل جیمیسن، ڈیرل مچل، جمی نیشم، ول او رورکی، ٹم رابن سن، بین سیئرز، ٹم سائفرٹ اور ایش سودھی شامل ہیں۔
نیوزی لینڈ کرکٹ بورڈ کے مطابق، ون ڈے اسکواڈ کا اعلان بعد میں کیا جائے گا۔