کراچی: وزیر تعلیم سندھ سردار شاہ نے انٹر سال اول کے طلبہ کے امتحانی نتائج کو غیرمنصفانہ قرار دیتے ہوئے کہا ہے کہ ان کے ساتھ ناانصافی ہوئی ہے۔
انٹرمیڈیٹ کے کم نتائج پر قائم فیکٹ فائنڈنگ کمیٹی کے اجلاس کے بعد گفتگو کرتے ہوئے سردار شاہ نے وضاحت کی کہ سندھ اسمبلی کی کمیٹی نے انکوائری کمیٹی کو معاملے کی مکمل تحقیقات کا اختیار دیا تھا۔ کمیٹی نے انٹربورڈ کے بنیادی ڈھانچے اور انتظامی امور پر سوالات اٹھائے، جبکہ امتحانی نظام میں پائی جانے والی خامیوں کی بھی نشاندہی کی۔
انہوں نے کہا کہ بورڈ کی ناقص کارکردگی کے باعث طلبہ کو نقصان نہیں پہنچنا چاہیے، اسی لیے تین مضامین میں اضافی نمبر دینے کا فیصلہ کیا گیا ہے۔ ان کا مزید کہنا تھا کہ سندھ اسمبلی کی خصوصی کمیٹی اپنی تحقیقات جاری رکھے گی اور حکومت نے انکوائری رپورٹ کو بغیر کسی ترمیم کے تسلیم کر لیا ہے۔
سردار شاہ نے یقین دہانی کرائی کہ انکوائری رپورٹ کی روشنی میں ملوث افراد کے خلاف کارروائی کی جائے گی۔ انہوں نے مزید کہا کہ عدالتی حکم امتناع کے باعث بورڈز میں مستقل چیئرمین کی تعیناتی تاحال ممکن نہیں ہو سکی۔