ینگون / مانیٹرنگ ڈیسک: میانمار اور تھائی لینڈ میں آنے والے شدید زلزلے کے نتیجے میں ہلاکتوں کی تعداد 1000 سے تجاوز کر گئی ہے۔ غیر ملکی خبر رساں ادارے کے مطابق سرکاری اعداد و شمار سے ظاہر ہوتا ہے کہ میانمار میں زلزلے سے 1002 افراد جان کی بازی ہار گئے، جبکہ 2400 سے زائد زخمی ہو چکے ہیں۔
خبر ایجنسی کے مطابق ریسکیو ٹیمیں ملبے میں دبے افراد کو نکالنے میں سرگرم عمل ہیں، جبکہ امریکی ادارے نے خدشہ ظاہر کیا ہے کہ زلزلے میں اموات کی تعداد 10 ہزار سے تجاوز کر سکتی ہے۔ میڈیا رپورٹس کے مطابق زلزلے کے شدید جھٹکے میانمار کے دوسرے بڑے شہر منڈالے میں محسوس کیے گئے، جن کا اثر 900 کلومیٹر دور تھائی لینڈ کے دارالحکومت بنکاک تک پہنچا، جہاں کئی عمارتیں گر گئیں۔
زلزلے کے جھٹکے بھارت کی ریاستوں میگھالیہ اور منی پور، بنگلہ دیش کے دارالحکومت ڈھاکا اور چین میں بھی محسوس کیے گئے۔ دوسری طرف، بنکاک کے حکام کے مطابق شہر میں 2000 سے زائد تعمیراتی ڈھانچوں میں دراڑیں پڑنے کی اطلاعات موصول ہوئی ہیں، جبکہ ایک زیر تعمیر بلند عمارت گرنے کے باعث 10 افراد ہلاک اور 100 مزدور لاپتہ ہو گئے۔
یاد رہے کہ گزشتہ روز میانمار اور تھائی لینڈ میں طاقتور زلزلہ آیا تھا، جس کی شدت امریکی جیولوجیکل سروے کے مطابق 7.7 تھی اور اس کی گہرائی 10 کلومیٹر ریکارڈ کی گئی۔ زلزلے کا مرکز میانمار کے شہر منڈالے سے 17.2 کلومیٹر دور تھا۔