پشاور/ مانیٹرنگ ڈیسک: پشاور میں مسجد کے باہر ہونے والے دھماکے میں شدید زخمی ہونے والے عالم دین مفتی منیر شاکر زخموں کی تاب نہ لاتے ہوئے چل بسے۔ پولیس کے مطابق افطار سے قبل ارمڑ کے علاقے میں مسجد کے باہر آئی ای ڈی دھماکا ہوا، جس میں مفتی منیر شاکر سمیت چار افراد زخمی ہوئے۔
دھماکے سے مسجد کی دیوار کو جزوی نقصان پہنچا، جبکہ زخمیوں کو لیڈی ریڈنگ اسپتال پشاور منتقل کیا گیا۔ اسپتال کے ترجمان کا کہنا ہے کہ مفتی منیر شاکر کی حالت تشویشناک تھی، تاہم وہ جانبر نہ ہو سکے۔ ان کا جسد خاکی اسپتال سے گھر منتقل کیا جا رہا ہے، جبکہ دھماکے میں زخمی ہونے والے دیگر تین افراد زیر علاج ہیں۔ بم ڈسپوزل یونٹ (بی ڈی یو) جائے وقوعہ سے شواہد اکٹھے کر رہا ہے۔
وزیر اعلیٰ خیبرپختونخوا علی امین گنڈا پور نے واقعے کی مذمت کرتے ہوئے پولیس حکام سے رپورٹ طلب کرلی اور ذمہ داروں کی گرفتاری کے لیے ضروری اقدامات کی ہدایت کی ہے۔ انہوں نے زخمیوں کی جلد صحت یابی کے لیے نیک خواہشات کا بھی اظہار کیا۔
مشیر اطلاعات بیرسٹر محمد علی سیف نے مفتی منیر شاکر کے انتقال پر اظہار افسوس کرتے ہوئے کہا کہ علماء کرام پر حملے تشویشناک اور قابلِ مذمت ہیں، جبکہ معصوم جانوں کے قاتل انسانیت کے دشمن ہیں۔ اسی طرح، صوبائی مشیر صحت احتشام علی نے بھی مفتی منیر شاکر کی وفات پر افسوس کا اظہار کیا۔