ٹوکیو / مانیٹرنگ ڈیسک: گزشتہ ماہ پاکستان کا دورہ کرنے والی جاپان کی سابقہ پورن اداکارہ رائے لل بلیک نے اسلام قبول کرلیا ہے۔ انہوں نے اپنے سوشل میڈیا اکاؤنٹس سے تمام نامناسب تصاویر اور ویڈیوز بھی ہٹا دی ہیں۔
رائے، جو کائے اساکرا کے نام سے بھی جانی جاتی ہیں، نے انکشاف کیا کہ 2024 میں ملائیشیا کے شہر کوالالمپور کے سفر کے دوران انہیں اسلام کے بارے میں جاننے کا موقع ملا، جس کے بعد انہوں نے دین اسلام کو اپنانے کا فیصلہ کیا۔
اپنے ٹک ٹاک اکاؤنٹ پر، رائے نے اپنے قبولِ اسلام کے سفر پر روشنی ڈالی اور سنگاپور کے پوڈکاسٹر زار اسماعیل سے بھی اس حوالے سے گفتگو کی۔ انہوں نے بتایا کہ گزشتہ سال اگست میں ملائیشیا کے دورے کے دوران، وہ مساجد دیکھنے اور مقامی مسلمانوں سے ملنے کی خواہش مند تھیں، اسی لیے انہوں نے حجاب پہننے کا تجربہ بھی کیا۔
انہوں نے کہا، "وہ لوگ میرے ساتھ بے حد مہربان تھے اور بہت اچھے طریقے سے میرا استقبال کیا۔ مجھے ایسا محسوس ہوا کہ یہ لوگ واقعی اچھے ہیں، تو میں ان کی ثقافت کو سمجھنے کی کوشش کیوں نہ کروں؟"
رمضان سے ایک ہفتہ قبل، سنگاپور میں اپنے مداحوں کے لیے ایک میٹ اینڈ گریٹ ایونٹ کی میزبانی کے دوران، انہیں جائے نماز اور سفری نماز کٹس جیسے تحائف دیے گئے۔ اس کے علاوہ، انہوں نے رمضان سے قبل اور اس دوران مختلف مساجد کے دوروں کی تصاویر اور ویڈیوز بھی سوشل میڈیا پر شیئر کیں۔
اپنی ایک پوسٹ میں، رائے نے لکھا، "مجھے امید ہے کہ یہ مبارک مہینہ ہمیں اللہ کے قریب ہونے کا موقع دے گا اور ہمیں اپنے خاندان، دوستوں، بھائیوں اور بہنوں کے ساتھ جوڑنے کا سبب بنے گا۔ میں بے حد خوش ہوں اور دعا کرتی ہوں کہ خدا اور آپ سب مجھے اس مہینے کو کامیابی سے گزارنے کی ہمت دیں۔ رمضان مبارک!"