لاہور / مانیٹرنگ ڈیسک: عوام پاکستان پارٹی کے سربراہ اور سابق وزیر اعظم شاہد خاقان عباسی نے انکشاف کیا ہے کہ ایم کیو ایم سینٹرل پنجاب کی مکمل قیادت ان کی جماعت میں شامل ہو رہی ہے۔
میڈیا سے گفتگو کرتے ہوئے شاہد خاقان عباسی نے بتایا کہ ایم کیو ایم سینٹرل پنجاب کی پوری باڈی عوام پاکستان پارٹی کا حصہ بن رہی ہے۔ اس موقع پر ایم کیو ایم سینٹرل پنجاب کے صدر شاہین گیلانی نے شمولیت کا اعلان کرتے ہوئے کہا کہ ہم نے شاہد خاقان عباسی کے ساتھ چلنے کا حتمی فیصلہ کر لیا ہے۔
شاہد خاقان عباسی نے ملک کو درپیش مسائل پر بات کرتے ہوئے کہا کہ حکومت میں عوامی مشکلات حل کرنے کی صلاحیت نہیں۔ ان کے مطابق چینی کی قیمت میں اضافہ حکومتی ناکامی کا نتیجہ ہے، جبکہ مسلم لیگ (ن) نے پہلے سولر پالیسی متعارف کروائی اور اب خود ہی اسے ختم کر دیا۔
انہوں نے مزید وضاحت کی کہ بجلی کی قیمتوں میں اضافے کی اصل وجوہات ڈالر کی قدر میں اضافہ اور آئی پی پیز کے مہنگے معاہدے ہیں۔ ان کا کہنا تھا کہ جب حکومت تحریری معاہدے توڑتی ہے تو اس کے منفی اثرات سامنے آتے ہیں۔ انہوں نے کہا کہ پہلے لوگ خود سے سولر سسٹم لگاتے تھے، مگر اب حکومت کو اپنی ناکام پالیسیوں کی وجہ سے خود یہ اقدام اٹھانا پڑ رہا ہے۔
سابق وزیر اعظم نے مزید کہا کہ ملک میں موجودہ بحران کی بنیادی وجہ غیر شفاف انتخابات ہیں۔ انہوں نے بلوچستان کے حالیہ سانحے کو ایک بڑا المیہ قرار دیتے ہوئے کہا کہ جب تک ان معاملات کی گہرائی تک پہنچ کر حل تلاش نہیں کیا جاتا، ملک میں بہتری ممکن نہیں۔