کراچی / مانیٹرنگ ڈیسک: کراچی کے علاقے ملیر ہالٹ کے قریب ایک افسوسناک حادثہ پیش آیا، جہاں تیز رفتار واٹر ٹینکر کی ٹکر سے موٹرسائیکل پر سوار حاملہ خاتون اور اس کا شوہر جاں بحق ہوگئے، جبکہ زخمی حالت میں پیدا ہونے والا نومولود بھی زندگی کی بازی ہار گیا۔
ریسکیو ذرائع کے مطابق یہ واقعہ ملیر ہالٹ کے نزدیک پیش آیا، جہاں واٹر ٹینکر نے میاں بیوی کو روند دیا۔ پولیس کا کہنا ہے کہ خاتون حاملہ تھی اور حادثے کے بعد شدید زخمی حالت میں بچے کو جنم دیا، مگر نومولود بھی جانبر نہ ہوسکا۔ پولیس نے ٹینکر کے ڈرائیور کو حراست میں لے کر گاڑی کو ضبط کرلیا ہے۔ ابتدائی تحقیقات کے مطابق، حادثہ ممکنہ طور پر بریک فیل ہونے کے باعث پیش آیا۔ حکام کے مطابق، واٹر ٹینکر ہائی وے سے آ رہا تھا اور ملیر ہالٹ پل کے نیچے سے گزر کر تیزی سے شارع فیصل کی طرف بڑھا، جس کے نتیجے میں یہ جان لیوا حادثہ رونما ہوا۔