اسلام آباد/ مانیٹرنگ ڈیسک: اقتصادی رابطہ کمیٹی (ای سی سی) نے نیٹ میٹرنگ کے تحت سولر صارفین سے خریدی جانے والی بجلی کی قیمت میں نمایاں کمی کر دی۔ اب نئے سولر صارفین سے بجلی 27 روپے کی بجائے 10 روپے فی یونٹ خریدی جائے گی، تاہم یہ فیصلہ پہلے سے موجود صارفین پر لاگو نہیں ہوگا۔
وزارت خزانہ کے اعلامیے کے مطابق سولر بجلی کی نئی قیمت کا تعین موجودہ مارکیٹ صورتحال کو مدنظر رکھ کر کیا گیا ہے۔ ای سی سی کا کہنا ہے کہ نئے سولر صارفین کو نیشنل گرڈ سے بجلی آف پیک ریٹ پر فراہم کی جائے گی۔ مزید برآں، کمیٹی کے مطابق سولر توانائی کی بڑھتی ہوئی پیداوار کے باعث روایتی گرڈ صارفین کے لیے بجلی سستی کرنے کی کوششوں کو نقصان پہنچ رہا تھا، جبکہ 80 فیصد سولر صارفین کا تعلق ملک کے 9 بڑے شہروں سے ہے۔
ای سی سی کو دی گئی بریفنگ میں بتایا گیا کہ دسمبر 2024 تک سولر صارفین نے روایتی گرڈ صارفین پر 159 ارب روپے کا بوجھ منتقل کیا، جو 2034 تک بڑھ کر 4,240 ارب روپے تک پہنچ سکتا ہے۔ بریفنگ میں یہ بھی انکشاف ہوا کہ دسمبر 2024 میں سولر صارفین کی تعداد 2 لاکھ 83 ہزار تک پہنچ گئی، جبکہ اکتوبر میں یہ تعداد 2 لاکھ 26 ہزار 440 تھی۔ اس کے علاوہ 2021 میں 321 میگاواٹ سولر بجلی پیدا ہو رہی تھی، جو دسمبر 2024 میں بڑھ کر 4,321 میگاواٹ ہوگئی۔