اسلام آباد/ مانیٹرنگ ڈیسک: پاکستان تحریک انصاف کے بانی عمران خان کی ہدایت پر وکیل فیصل چوہدری کو قانونی ٹیم سے الگ کر دیا گیا۔
ذرائع کے مطابق یہ فیصلہ اڈیالہ جیل میں وکلا کی ملاقات کے دوران کیا گیا، جہاں پارٹی کے جنرل سیکرٹری سلمان اکرم راجہ نے بانی پی ٹی آئی کو فیصل چوہدری کے بیانات سے متعلق آگاہ کیا۔ بانی پی ٹی آئی نے فیصل چوہدری کو وکلا ٹیم سے ہٹانے کی منظوری دے دی، جس کے بعد انہیں پی ٹی آئی وکلا کے واٹس ایپ گروپ سے بھی نکال دیا گیا۔ ذرائع کے مطابق فیصل چوہدری سے تمام قانونی معاملات اور مقدمات کی ذمہ داریاں واپس لے لی گئیں۔
مزید یہ کہ وکلا کی اسی ملاقات میں مشعال یوسفزئی سے متعلق بھی گفتگو ہوئی، جس کے دوران بشریٰ بی بی نے انہیں آئندہ ملاقات میں شامل کرنے کی ہدایت دی۔