ممبئی/ مانیٹرنگ ڈیسک : بالی وڈ کی سپر اسٹار ایشوریا رائے بچن کی لگژری گاڑی کو ممبئی کے جوہو علاقے میں ایک بس نے ٹکر ماری، جس کی ویڈیو بھی منظر عام پر آئی ہے۔ بھارتی میڈیا کے مطابق، ممبئی میں جیسے ہی ایشوریا رائے کی گاڑی کو ٹکر لگی، سڑک پر ہجوم اکٹھا ہوگیا، جبکہ اداکارہ کے باڈی گارڈز نے فوری طور پر گاڑی سے باہر قدم رکھا۔
26 مارچ بروز بدھ ایک فوٹوگرافر نے سوشل میڈیا پر ویڈیو شیئر کی، جس میں واضح ہے کہ ایک بڑی لال بس نے گاڑی کو پیچھے سے ٹکر ماری۔ میڈیا رپورٹس کے مطابق، گاڑی کو پیچھے سے ٹکر لگنے کے باوجود کوئی سنگین نقصان نہیں ہوا اور اس وقت ایشوریا رائے گاڑی میں موجود نہیں تھیں۔
این ڈی ٹی وی کی رپورٹ کے مطابق، حادثے کے فوراً بعد جوہو تارا روڈ پر امیتابھ بچن کے رہائشی علاقے کے قریب ایک بنگلے سے سکیورٹی گارڈ باہر آیا اور بس ڈرائیور کو تھپڑ مار دیا۔ رپورٹ کے مطابق، بس ڈرائیور گاڑی کو پہنچے نقصان کا جائزہ لینے کے لیے باہر نکلا تھا جس پر گارڈ نے اسے تھپڑ مارا۔
بعد میں جب پولیس موقع وقوعہ پر پہنچی، تو بنگلے کے نگران عملے نے بس ڈرائیور سے معذرت کی اور واقعے کی کوئی ایف آئی آر درج نہیں کی گئی۔