12 اپریل کو چھٹی کا اعلان کردیا گیا

 لاہور/ مانیٹرنگ ڈیسک: پنجاب حکومت نے معروف صوفی بزرگ حضرت شاہ حسینؒ المعروف میلہ چراغاں کے سالانہ عرس کے موقع پر 12 اپریل بروز ہفتہ کو لاہور میں عام تعطیل کا اعلان کیا ہے۔

سروسز اینڈ جنرل ایڈمنسٹریشن ڈیپارٹمنٹ (S&GAD) کی جانب سے جاری کردہ نوٹیفکیشن کے مطابق، اس دن لاہور ضلع کے تمام سرکاری دفاتر اور ادارے بند رہیں گے تاکہ شہری اس اہم ثقافتی و روحانی موقع پر منعقد ہونے والی تقریبات میں با آسانی شریک ہو سکیں۔

نوٹیفکیشن میں یہ بھی واضح کیا گیا ہے کہ یہ تعطیل صرف لاہور ضلع تک محدود ہو گی، اور اس کے تمام ذیلی دفاتر بھی بند رہیں گے۔ تاہم، پنجاب سول سیکرٹریٹ، اس سے متعلقہ محکمے اور علاقائی دفاتر اس تعطیل سے مستثنیٰ ہوں گے۔

میلہ چراغاں، جسے "روشنیوں کا میلہ" بھی کہا جاتا ہے، حضرت شاہ حسینؒ کے عرس کے سلسلے میں ہر سال منعقد کیا جاتا ہے۔ حضرت شاہ حسینؒ 16ویں صدی کے ممتاز پنجابی صوفی شاعر تھے، اور ان کا مزار لاہور کے شالامار باغ کے قریب واقع ہے جہاں یہ تقریب ہوتی ہے۔

یہ میلہ کئی دن جاری رہتا ہے، جس میں صوفی موسیقی، شاعری اور روایتی رسومات پیش کی جاتی ہیں، جو لاہور کی روحانیت اور ثقافتی پہچان کو اجاگر کرتی ہیں۔