اسلام آباد: حکومت نے مختلف ممالک سے بے دخل کیے گئے پاکستانیوں کے پاسپورٹ معطل کر دیے۔
وفاقی وزیر داخلہ محسن نقوی نے امیگریشن اور پاسپورٹ کے ڈائریکٹوریٹ کا دورہ کیا، جہاں ایک اہم اجلاس کی صدارت کے دوران انہیں آگاہ کیا گیا کہ 53 ہزار پاکستانی شہریوں کے پاسپورٹ ڈی پورٹ کیے جانے کے بعد بلاک کر دیے گئے ہیں۔
اجلاس میں وزیر مملکت داخلہ طلال چوہدری، سیکرٹری داخلہ محمد خرم آغا، ڈی جی ایف آئی اے رفعت مختار راجہ اور ڈی جی پاسپورٹ مصطفیٰ جمال قاضی بھی شریک تھے۔
محسن نقوی نے پاسپورٹ کے اجرا کے لیے نئی شرائط کے حوالے سے قانونی ضوابط جلد مکمل کرنے کی ہدایت دیتے ہوئے کہا کہ ان اقدامات سے غیر قانونی ہجرت اور پیشہ ورانہ بھیک مانگنے کے رجحان پر قابو پایا جا سکے گا، اور ڈی پورٹ شدہ افراد کے پاسپورٹ بلاک کرنے کے عمل پر مکمل عملدرآمد یقینی بنایا جائے۔
طلال چوہدری نے کہا کہ اس فیصلے سے عالمی برادری میں پاکستان کا مثبت امیج ابھرے گا۔