بھارت: ریاست گجرات کے مہسانہ ضلع میں پیر کی شام ایک تربیتی طیارہ گر کر تباہ ہوگیا۔بھارتی میڈیا کے مطابق یہ فضائی حادثہ مہسانہ کے اُچارپی گاؤں کے قریب پیش آیا، جس میں ایک خاتون ٹرینی پائلٹ زخمی ہو گئیں۔ زخمی پائلٹ کو فوری طور پر طبی امداد کے لیے اسپتال منتقل کر دیا گیا۔ مہسانہ تعلقہ پولیس اسٹیشن کے انسپکٹر ڈی جی بدوا کے مطابق، سنگل انجن والا یہ طیارہ تکنیکی خرابی کے باعث حادثے کا شکار ہوا۔
انسپکٹر بدوا نے بتایا کہ طیارہ مہسانہ ہوائی اڈے سے ٹیک آف کرنے کے بعد ایوی ایشن اکیڈمی کا ٹرینر طیارہ ایک کھیت میں جا گرا۔ رپورٹ کے مطابق، بھارت میں طیاروں کے حادثات کوئی نئی بات نہیں، اس سے پہلے بھی کئی ایسے واقعات ہو چکے ہیں۔ ایک طرف بھارت جدید ایف-35 طیارے خریدنے کی بات کرتا ہے، تو دوسری طرف اس کے تربیتی طیارے بھی محفوظ نہیں۔
رواں ماہ 7 تاریخ کو بھی ایک ہی دن میں دو بھارتی طیارے گر کر تباہ ہوئے، جن میں سے ایک لڑاکا طیارہ تھا۔ دفاعی ماہرین کا کہنا ہے کہ بھارتی فضائیہ میں حادثات معمول بنتے جا رہے ہیں اور یہ خود اپنے لیے ایک بڑا خطرہ بن چکی ہے۔ ایک رپورٹ کے مطابق، گزشتہ 30 برسوں میں بھارتی فضائیہ کے 534 طیارے تباہ ہو چکے ہیں، جن میں 152 پائلٹ اپنی جان سے ہاتھ دھو بیٹھے، جبکہ صرف گزشتہ پانچ سالوں میں 45 فضائی حادثات پیش آئے ہیں۔