جدہ: سعودی عرب میں عمرہ زائرین کی بس کو پیش آنے والے حادثے میں 5 پاکستانی افراد جاں بحق جبکہ متعدد زخمی ہو گئے، جاں بحق ہونے والوں میں 3 خواتین شامل ہیں۔
تفصیلات کے مطابق عمرہ زائرین کو لے جانے والی بس البدر سے مدینہ منورہ جاتے ہوئے ایک ٹرالر سے ٹکرا گئی، جس کے نتیجے میں بس میں موجود پاکستان سے تعلق رکھنے والی 3 خواتین سمیت 5 افراد موقع پر ہی جاں بحق ہو گئے، جبکہ دیگر افراد زخمی ہوئے۔
ریسکیو ذرائع نے بتایا ہے کہ زخمیوں اور لاشوں کو فوری طور پر قریبی اسپتالوں میں منتقل کر دیا گیا، زخمیوں میں خواتین، بچے اور بزرگ شامل ہیں۔
ذرائع کے مطابق جاں بحق افراد کا تعلق پنجاب کے ضلع بہاولنگر سے ہے۔ جاں بحق خواتین میں دو کا تعلق گاؤں 228 نائن آر جبکہ ایک خاتون کا تعلق گاؤں 201 مراد سے ہے۔ مردوں میں ایک بزرگ گاؤں 39 تھری آر اور دوسرے بزرگ کا تعلق ڈاہرنوالہ شہر سے بتایا جا رہا ہے۔