کراچی/ مانیٹرنگ ڈیسک: پولیس افسر سوشل میڈیا پر صدرِ مملکت کے خلاف نازیبا تبصرہ کرنے پر گرفتار، پیکا کے تحت کارروائی عمل میں لا دی گئی ۔
کراچی میں ایک پولیس اہلکار کو سوشل میڈیا پر صدرِ پاکستان آصف علی زرداری کے خلاف نازیبا اور توہین آمیز الفاظ استعمال کرنے پر گرفتار کرلیا گیا۔ یہ کارروائی پیکا آرڈیننس کے تحت عمل میں لائی گئی۔
تفصیلات کے مطابق، ایس آئی او ابراہیم حیدری کے انویسٹی گیشن افسر ابرار شاہ نے 2 اپریل کو اپنے فیس بک اکاؤنٹ پر صدرِ پاکستان کے خلاف ایک نازیبا پوسٹ شیئر کی تھی۔ اس اقدام پر سکھن تھانے کے ڈیوٹی افسر یعقوب کی شکایت پر مقدمہ درج کیا گیا۔ ایف آئی آر میں بتایا گیا ہے کہ ابرار شاہ نے رات 8 بج کر 40 منٹ پر ایک انگریزی کمنٹ میں صدر کے منصب پر فائز شخصیت کی توہین کی، جو پیکا ایکٹ کی دفعہ 504 اور پی پی سی 21 کے زمرے میں آتا ہے۔ واضح رہے کہ صدر آصف علی زرداری ان دنوں علیل ہیں اور کراچی کے ایک نجی اسپتال میں زیر علاج ہیں۔