لاہور: پنجاب کے مختلف اضلاع میں آج مون سون بارشوں کا امکان ہے۔
پی ڈی ایم اے پنجاب کے ترجمان کے مطابق صوبے کے کئی اضلاع میں مون سون کا چوتھا مرحلہ شروع ہو چکا ہے جو نہایت طاقتور ہے اور یہ سلسلہ 25 جولائی تک جاری رہنے کی توقع ہے۔ ترجمان نے بتایا کہ راولپنڈی، مری، گلیات، اٹک، چکوال، منڈی بہاؤالدین، حافظ آباد، گجرات، جہلم اور گوجرانوالہ میں بارشیں متوقع ہیں۔
علاوہ ازیں، لاہور، فیصل آباد، سیالکوٹ، نارووال، ٹوبہ ٹیک سنگھ، جھنگ، سرگودھا، میانوالی، ڈیرہ غازی خان، بہاولپور، بہاولنگر اور ملتان میں بھی بارشوں کی پیش گوئی کی گئی ہے۔
ڈی جی پی ڈی ایم اے عرفان علی کے مطابق، بالائی علاقوں میں متوقع بارشوں کی وجہ سے دریاؤں میں پانی کی سطح بلند ہونے کا خدشہ ہے، جس کے پیش نظر ندی نالوں میں طغیانی کا الرٹ جاری کر دیا گیا ہے۔ دریائے راوی، چناب، ستلج اور جہلم میں بھی پانی کے بہاؤ میں اضافے کا امکان ہے۔ انہوں نے مزید کہا کہ دریائے سندھ میں تونسہ کے مقام پر درمیانے درجے کا سیلاب ہے جبکہ تربیلا، کالا باغ اور چشمہ کے مقام پر نچلے درجے کا سیلاب ریکارڈ کیا گیا ہے۔