پاکستان اور ویسٹ انڈیز کے درمیان طے شدہ تین ایک روزہ میچز اپنے مقررہ شیڈول کے تحت ہی کھیلے جائیں گے۔ پاکستان کرکٹ بورڈ (پی سی بی) نے ان میچز کو ٹی ٹوئنٹی فارمیٹ میں تبدیل کرنے کی درخواست دی تھی، تاہم ویسٹ انڈیز کرکٹ بورڈ نے پہلے سے جاری منصوبے پر عمل کرتے ہوئے ٹی ٹوئنٹی اور ون ڈے دونوں فارمیٹس کے لیے ٹکٹوں کی فروخت کا آغاز کردیا ہے۔
امریکا میں ہونے والی ٹی ٹوئنٹی سیریز کے ٹکٹوں کی قیمتیں 25 اور 30 ڈالر رکھی گئی ہیں، جبکہ ون ڈے میچز کے ٹکٹ پانچ اور آٹھ ڈالر میں دستیاب ہیں۔ ویسٹ انڈیز کرکٹ بورڈ نے 8 سے 12 اگست تک شیڈول تین ون ڈے میچز کے ٹکٹ آن لائن فروخت کرنا شروع کر دیے ہیں، جو ان کی سرکاری ویب سائٹ کے ذریعے حاصل کیے جا سکتے ہیں۔
ٹی ٹوئنٹی سیریز کا آغاز 31 جولائی سے فلوریڈا، امریکا میں ہوگا۔ دوسرا میچ 2 اگست اور تیسرا 3 اگست کو کھیلا جائے گا۔ اس کے بعد پہلا ون ڈے میچ 8 اگست کو برائن لارا کرکٹ اسٹیڈیم، ٹرینیڈاڈ اینڈ ٹوباگو میں کھیلا جائے گا۔ دوسرا ون ڈے 10 اگست اور تیسرا 12 اگست کو اسی میدان میں منعقد ہوگا۔