تین میچز پر مشتمل ٹی ٹوئنٹی سیریز کے پہلے میچ پاکستان نے ویسٹ انڈیز کو 14 رنز سے شکست دے کر سیریز میں برتری حاصل کرلی۔ یہ میچ امریکی ریاست فلوریڈا کے شہر لاؤڈرہل میں کھیلا گیا، جہاں ویسٹ انڈیز کے کپتان شائے ہوپ نے ٹاس جیت کر پاکستان کو پہلے بیٹنگ کی دعوت دی۔
پاکستان نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 178 رنز بنائے۔ صائم ایوب نے شاندار کارکردگی دکھاتے ہوئے 57 رنز بنائے جبکہ فخر زمان نے 28 رنز کی اننگز کھیلی۔ حسن نواز نے 24، فہیم اشرف نے 16 اور صاحبزادہ فرحان نے 14 رنز اسکور کیے۔ کپتان سلمان علی آغا 11 اور محمد حارث 6 رنز کے ساتھ ناٹ آؤٹ رہے۔
ویسٹ انڈیز کی جانب سے شمار جوزف نے 3 کھلاڑیوں کو آؤٹ کیا، جبکہ جیسن ہولڈر، عقیل حسین اور روماریو شیفرڈ نے ایک ایک وکٹ حاصل کی۔
179 رنز کے ہدف کے تعاقب میں ویسٹ انڈیز کی ٹیم 20 اوورز میں 7 وکٹوں پر صرف 164 رنز ہی بنا سکی۔ پاکستان کی جانب سے محمد نواز نے 3 وکٹیں حاصل کیں، صائم ایوب نے 2 کھلاڑیوں کو آؤٹ کیا، جبکہ شاہین شاہ آفریدی اور سفیان مقیم نے ایک ایک وکٹ حاصل کی۔
پاکستان کی ٹیم میں شامل کھلاڑیوں میں صاحبزادہ فرحان، صائم ایوب، فخر زمان، محمد حارث (وکٹ کیپر)، سلمان علی آغا (کپتان)، حسن نواز، محمد نواز، فہیم اشرف، شاہین آفریدی، حارث رؤف اور سفیان مقیم شامل تھے۔